Pilsnár & poesiija
Go leat gakcun dan guhkes vuostálaga ja leat Gállogiettis, de leat measta joavdan. Ja de ii leat go bijadit báraguovllu guvlui ja báralávvui. Go doppe dat geavvá. Doppe dat pilsnár deaivvada poesiijain.
Stina Inga boahtá lohkat oasáža Jag dör en kort stund, midja lea guhkesdikta mas nisu govvádallá iežas eallima ráhkisvuođa, midjas muhtin áiggi maŋŋá rievdá bahča beahttašupmin, panihkalaš ballun ja jápminballun. Iežas ođđa diktačoakkáldagain čájeha Stina Inga ahte son lea okta dain deháleamos sámi poehtain mat mis leat dál.
- Lea gelddolaš joavku čállit dán jagáš Pilsnár & Poesijas. Stina Inga lea Gironis Ruoŧa bealde eret, ja lea guhkit áiggi bargan oahpaheaddjin Skániin. Sus lea dehálaš fáddá girjjis, ja mun hervvošan su go duostá čállit veahkaválddálašvuođa birra lagaš gaskavuođain, muitala festiválajođiheaddji Marita Eilertsen.
Ovttas Stina Ingain boahtiba Risten Biret Elle Eira ja Johan Sandberg McGuinne. Risten Biret galgá lohkat oasáža noveallas Sohkarieti, midja lea nissona birra guhte heahpatvuođa dihte guođđá iežas máná meahccái jápmit. Novealla duhkoraddá sámi dološ jáhkuin ja tabuiguin.
- Risten Biret lea nuorra taleanta Guovdageainnus eret. Mii illudat gullat oasáža su noveallas, ja mii leat gealdagasas oaidnit maid son boahtteáiggis olaha, dadjá festiválajođiheaddji áŋgirit.
Johan Sandberg McGuinne lea sámi čálli, girjjálašvuođadiehtti, oahpaheaddji ja aktivista. McGuinne lea oarjánsápmelaš ja gealalaš, ja okta sis guhte lea álggahan sámi fanzine Sápmi 2.0 – Subalter No More. Fanzine lea dáidda- ja aktivistaprošeakta mii dáhttu veahkehit sápmelaččaid váldit ruovttoluotta gielaset, sin rupmašiid, miela ja árbevirolaš guovlluid dekoloniserema bokte. Márkomeanus galgá son lohkat oasáža iežas čállosis mii lei Giellamielas.
- Johan lea sámi multidáiddár. Son čállá, juoigá, vuolggaha dehálaš digaštallamiid - ja duddjo dasa lassin hui čáppa dujiid. Olmmoš ii goassige dieđe mii McGuinne boahtte prošeakta lea, muhto ii leat eahpádus ahte lea juoga gelddolaš. Lea láhččojuvvon gelddolaš eahkedii Gállogiettis, muitala Eilertsen.
Pilsnár & poesiija lágiduvvo ovttas Romssa fylkkasuohkaniin.