Háliida álggahit luohterevolušuvnna
Govven: Jonne Sikku
Dadjet ahte juohkehaš sáhttá luođi rohttestit, ja ahte sáhttá juoigat váikko man. Muhto ii leat seammá lunddolaš juohkehažžii juoigat; dán háliida Márkomeannu leahkit mielde rievdadeamis.
Meahccesihkkelis lea iežas luohti, njálas lea iežas luohti, na, váikko Norgga Kulturráđđi sáhttá miháštallat iežas luđiin. Muhto dáđi bahábut, nugo sámegiella, lea luohteárbi šaddan gierdat garra dáruiduhttima ja vealaheami girkus ja stáhtas. Máŋga guovlluin lea luohti áibbas jávkan, dan háliida Márkomeannu rievdadit.
Luohtedeaddu
Dán jagi Márkomeannuprográmmas leat dievva luohteherskkot. Sierra luohtetrubadura mánáide, populearadieđalaš logaldallan luođi birra, luohtekonferansiera ja drop-in luohtekursa midjas galgá giktit luođi festiválagussiid čoddagiin. Festiválabuvttadeaddji Susanne Langstrand-Andersen dadjá Márkomeannu galgá leahkit mielde máhcahit luođi Oarje-Romsii* ja Ufuhtii.
- Dán jagi galgá luohti gullot earenoamáš jitnosit Márkomeanus, mojohallá festiválaáŋgiris buvttadeaddji.
Bahás beaggin maid ii leat ánssášan
Jur nugo sámegielas, leat nai luođis iežas geográfalaš suopmanat ja iešvuođat. Oarje-Romssas ja Ufuohtas lea luohti measta álfárut jávkan, ja stuorra oassi báikkálaš luohtesuopmanis lea láhppon.
- Lea measta beare muitalusaid bokte ahte dát oassi min kulturárbbis eallá. Márkomeannu lea nai Oarje-Romssas ja Ufuohtas hárves arena, gonnes luohti duođas gullo ja gonnes luohti lea vel lunddolaš oassin musihkkaprográmmas. Muhto mii háliidit luohti gullot eará báikkiin go beare lávddis, dadjá Langstrand-Andersen. Su mielas lea luohti ožžon bahás beaggima maid ii leat ánssášan.
- Eai leat nu máŋgasat min guovllus geat leat bajásšaddan luđiin, ja lea mu mielas oba suddu. Luohti ii leat ánssášan diekkár beaggima, dávjá lea jurddašeapmi ahte lea boaresáigásaš ja hehppehahtti. Muhto luohti han lea oalle ođđaáigásaš, cealká festiválabuvttadeaddji, ja čujuha dasa ahte leat hui ollu nuorra, sámi artisttat geat leat gálledan Norgga festiválain dán geasi.
Rahppo luđiin
Márkomeannu lágiduvvo suoidnemánu 28.-31. beivviid Gállogiettis Evenáššis, ja festivála rahppo dieđus luđiin.
- Mii allaáiggálaččat rahpat festivála govvenvuosehusain Ivar Murbergas, ja dasa lassin dieđus luđiin, loahpaha Susanne Langstrand-Andersen.
Luohteprográmma lágiduvvo ovttasbarggus Sámedikkiin ja Norgga Kulturráđiin.
* Oarje-Romsa lea Márkomeanu báikkálaš suopmanis «Sør-Troms»