Márkomeannu 2022

The Vuogas Way: Sániidkeahtta hállat

The Vuogas Way lea Lásságámmi vuođđudusa ođđa dáiddakonseapta, ja lea vuosttas prošeakta konseaptaráiddus mas lea vuosttaščájálmas Márkomeannus. The Vuogas Way: Sániidkeahtta hállat lea dan birra mo biktasat ja duodji mat sápmelaččat guddet eallima čađa gulahallet birrasiin.

Ovtta daid ovddimus áššedovdiiguin Áillohačča eallima ja barggu birra, Marjut Aikio, lea lohkan ahte Áillohaš dávjá geavahii sáni vuogas su iešsárgujuvvon stobu Lásságámmi birra, ja maid stohpoortnega birra.

Ovcci sámi duojára leat válljen performance-artistta, dahje ovdanbuktet ieš, go beassat oaidnit mo iešguđet duojárat dulkojit mii lea vuogas, sihke tekstiillaid ja ealli performanca čađa.

Vuosttaščájálmas lea bearjadaga dii. 13.00, ja lávvordaga dii. 13.00 lea fas čájálmas. Čájálmas lea váldolávddi gurut bealde Gállogiettis.

Oassálasti duojárat ja sin performance-artisttat leat:
Liisa-Ravna Finbog - Timimie Märak
Nelly Engström - Rönn Lisa Zackrisson
Anna-Stina Svakko - Dávvet Bruun-Solbakk
Katarina Spik Skum - Astrid Tuorda
Irina Sajets - Petra Laiti
Anniina Turunen - Tiina Sanila-Aikio
Ramona Salo - Biret ja Gáddjá Haarla
Sunná Káddjá Valkeapää – ovdanbuktá ieš
Ellen Berit Dalbakk – ovdanbuktá ieš

Prošeavtta juolludeaddjit leat Nordisk Kulturfond, Norsk Kulturfond, Sámediggi, Norsk-finsk kulturfond, Lásságámmi vuođđudus ja Márkomeannu.