Addet nuoraide ođasdeskka
Leat go Instagram-ruovdi? Dahje leat go gaittiinnaid oiddot Snapas? Dán jagi Márkomeanus bovdejuvvojit nuorat mediebádjái ja ožžot dalle iežat gutni reidet festiválaođđasiid.
Govven: Jonne Sikku
Festivála lágiduvvo Evenáššis suoidnemánu 28.-31. beivviid, ja sáhttá rámidit nana mánáid- ja nuoraidprográmma dán jagi festiválas. Oažžu vásihit sihke intiimakonseartta popseaibenásttiin Ágy ja máŋga iešguđetlágan bájiid ja drop-in-kurssaid. Okta dain kurssain lea mediebádji midjas lea ožžon nama Mediebádji#márkomeannu.
Sierra preassalatnja
Láhčejuvvo sierra preassalanja festiválabáikkis gonnes nuorat, hárjánan journalisttat bagadallin, besset leahkit mielde reidemis neahtta-TV ja ođasáššiid festiválas. Bádji lágiduvvo ovttasbarggus Harstad Tidende-áviissain.
- Lea oba hearvái ahte Harstad Tidende servet dasa ja leat oassin festiválas. Midjiide lea earenoamáš suohtas ahte sis lea miella doallat mediebáji nuoraide. Gal lea beare “gahppat mielde”, muitala festiválajođiheaddji Marita Kristin Eilertsen.
Ožžot gaittin preassavuoigatvuođaid
Báji oasseváldit ožžot gaittin preassavuoigatvuođaid, ja ožžot eksklusiiva vejolašvuođa jearahallat Márkomeanu artisttaid. Eilertsen muitala ahte juohkehaš geas lea smarttelefuvdna sáhttá searvat.
- Lea earenoamáš vejolašvuohta nuoraide deaivvadit artisttaiguin, ja oažžut ipmárdusa goktes lea bargat journalistan. Ii dárbbat man ge fancy rusttegat, juohkehaš geas lea smarttelefuvdna sáhttá searvat, sárdnu festiválajođiheaddji áŋgirit.
Bádji lágiduvvo bearjadaga ja lávvardaga festiválavahkus ja ferte ovdagihtii dieđihit dasa. Leat ráddjejuvvon sajit. Gáibiduvvo Nuoraidmeannu- dahje festiválapássa searvat.
Dieđihandieđuid gámná www.markomeannu.no:as, báji ahkemearri lea 13-20 jagi.